Management နဲ့ Leadership ရဲ့ အဓိကကွာခြားချက်ကတော့  Management ဟာလေ့ကျင့်ထားတဲ့ကျွမ်းကျင်မှုနဲ့ သက်ဆိုင်ပြီး  Leadership ကတော့ အနုပညာ ဒါမှမဟုတ်အတတ်ပညာနဲ့သက်ဆိုင်ပါတယ်။ များသောအားဖြင့် The skill of management and the art of leadership လို့ ပြောလေ့ရှိကြပါတယ်။

Management Skills လို့ပြောတဲ့အခါ လုပ်ငန်းအဖွဲ့အစည်းအတွက် မဟာဗျူဟာ (Strategy) ချမှတ်နိုင်စွမ်းရှိတာ ၊  ဝန်ထမ်းတွေကို စနစ်တကျ စုစည်းပြီး ဖွဲ့စည်းပုံ (structure) ချမှတ်ထားနိုင်တာ၊ ငွေကြေးနဲ့ဘဏ္ဍရေးကိစ္စတွေ၊ နေ့စဉ်လုပ်ငန်းဆောင်တာတွေအပေါ်စနစ် (System) ကျကျ ထိန်းသိမ်းနိုင်စွမ်းရှိတာကိုဆိုလိုပါတယ်။

ဒါပေမယ့်စဉ်ဆက်မပြတ် အရှိန်အဟုန်နဲ့ ပြောင်းလဲနေတဲ့စီးပွားရေးပါတ်ဝန်းကျင်မှာ မန်နေဂျာတွေအဖို့ Management Skill နဲ့တင် မလုံလောက်တော့ပါဘူး။ အနာဂါတ်မှာ ကြုံတွေ့ရမည့် စိန်ခေါ်မှုတွေကို  ကျော်လွားနိုင်ဖို့ ၊ အခွင့်အလမ်းတွေ ရယူနိုင်ဖို့နဲ့ မိမိအဖွဲ့အစည်းကို အားထည့်ထားဖို့တွက် ခေတ်သစ်မန်နေဂျာတွေဟာ အမြင်ကျယ်ပြီး ဉာဏ်ပညာအမျှော်အမြင်ပြည့်စုံဖို့ လိုအပ်လာပါတယ်။

ဒါကြောင့်လုပ်ငန်းတွေအောင်မြင်ဖို့အတွက် Management တခုတည်းသာမက Leadership ပါလိုအပ်လာပါတယ်။ Leadership မှာတော့ ကျိုးကြောင်းဆင်ခြင်မှူ ပါရှိပြီး လုပ်ငန်းလုပ်ဆောင်တဲ့အခါ  ရည်ရွယ်ချက် (Purpose) ၊ စဉ်ဆက်မပြတ်လှုပ်ရှားနေတဲ့ ဖြစ်စဉ်တွေ (Process) နဲ့ ကျွမ်းကျင်ပြီးစွမ်းရည်ပြည့်တဲ့သူတွေ (People) တို့ကို အဓိကထားပြီး စူးစိုက်ဆုံးဖြတ် လုပ်ဆောင်ပါတယ်။

Management နဲ့ Leadership ရဲ့ အဓိကကွာခြားချက်သုံးခုကတော့ (၁) Management က Planning နဲ့ strategy ကို ဇောင်းပေးပြီး Leadership က Organization Purpose ကို ဦးစားပေးပါတယ်။ (၂) Management  ကလုပ်ငန်းအဖွဲ့အစည်းရဲ့ Formal Structural Design ကိုအာရုံစူးစိုက်ထားပြီး Leadership က Effective  Management Process ကိုအာရုံစူးစိုက်ထားပါတယ်။ (၃) Management ကဝန်ထမ်းတွေကို ထိန်းချုပ်ကြပ်မတ်ဖို့တာဝန်ယူပြီး Leadership က လုပ်ငန်းမှာရှိတဲ့လူတွေရဲ့ ကျွမ်းကျင်မှူနဲ့ စွမ်းဆောင်ရည်တိုးတက်မှုကို တာဝန်ခံဆောင်ရွက်ပါတယ်။ Management နဲ့ Leadership ကွာခြားမှုရှိပေမယ့် တစ်ခုနဲ့တစ်ခု သီးခြားသတ်မှတ်လို့မရနိုင်သလို တစ်ခုနဲ့တစ်ခု ကင်းကွာလို့ မရနိုင်ပါဘူး။

Management ရဲ့မူလလုပ်ဆောင်ချက် လုပ်ငန်းတာဝန်တွေကိုလည်း ပစ်ပယ်လို့မရပါဘူး။ Management နဲ့ Leadership ပေါင်းစပ်နိုင်မှသာ လုပ်ငန်းအောင်မြင်နိုင်ပြီး အဲဒီအောင်မြင်မှူကို ဆက်လက်ထိန်းသိမ်း နိုင်မှာဖြစ်ပါ တယ်။

လုပ်ငန်းမှာ ရည်မှန်းချက်နဲ့ အလုပ်အစီအစဉ်တွေသတ်မှတ်ဖို့နဲ့ သတ်မှတ်ထားတဲ့အလုပ်တွေ  သတ်မှတ်ထားတဲ့အချိန်အတွင်း သတ်မှတ်ထားတဲ့ဘတ်ဂျက်အတိုင်း ပြီးဖို့ Management ဟာမရှိမဖြစ်လိုအပ်ပါတယ်။ Management ဟာ အလုပ်အစီအစဉ်တွေ Planning ရေးဆွဲသတ်မှတ်ရသလို သတ်မှတ်ချက်တွေနဲ့အညီ ကိုက်ညီမှုရှိမရှိကို Controlling ပြန်လုပ်ရပါတယ်။ Management ဟာလုပ်ငန်းရဲ့ အမြတ်ရရှိနိုင်စွမ်းကို ထိန်းချုပ်လုပ်ဆောင်ရုံသာမက ဘတ်ဂျက်ဘောင်အတွင်း အချိန်ကာလသတ်မှတ်ချက် ဘောင်အတွင်း ပြီးစီးလုပ်ဆောင်နိုင်မှုကိုပါထိန်းချုပ်ရပါတယ်။ လုပ်ငန်းမှာရှိတဲ့ ဝန်ထမ်းတွေ၊ လူတွေကို စနစ်တကျဖွဲ့စည်းဆောင်ရွက်တဲ့အခါမှာ စီမံခန့်ခွဲမှု (Management) သာမက ဦးဆောင်မှု (Leadership)  ပါလိုအပ်လာပါတယ်။

ဝန်ထမ်းစည်းမျဉ်းစည်းကမ်းနဲ့ အလုပ်စံတွေသတ်မှတ်ပေးဖို့ တဖက်မှာလိုအပ်သလို တဖက်မှာလည်း ဝန်ထမ်းတွေကို စနစ်တကျဆောင်ရွက်တတ်အောင် ပံ့ပိုးမှု၊ သင်ကြားမှု နဲ့ အားပေးမှုတွေပေးရပါမယ်။ ခေတ်သစ်အဖွဲ့အစည်းတွေမှာ ဝန်ထမ်းတွေကိုယ်တိုင်ပါဝင်ပြီး စီမံကိန်းအစီအစဉ် တွေ ရေးဆွဲစေတဲ့  အစီအစဉ်တွေ ပေးထားပါတယ်။ ဝန်ထမ်းတွေဆီကအဖွဲ့အစည်းရဲ့မျှော်မှန်းချက်နဲ့ အဖွဲ့အစည်းပေါ် ဝန်ထမ်းကမျှော်မှန်းနိုင်မှုကိုလည်း ပွင့်ပွင်လင်းလင်း အသိပေးထားပါတယ်။ အမိန့်နဲ့ ထိန်းချုပ်မှုဟာ နေ့စဉ်လုပ်ငန်းလုပ်ဆောင်မှုအတွက် လိုအပ်ပြီးရေရှည်မှာတော့ ဝန်ထမ်းတွေမှာ ကောင်းမွန်တဲ့ အလေ့အထနဲ့ အပြုအမူတွေရှိလာအောင် လေ့ကျင့်ပေးဖို့ လိုအပ်ပါတယ်။

သင်ယူလိုစိတ်၊ ပူးပေါင်းဆောင်ရွက်လိုစိတ်တွေရှိလာအောင်နဲ့ ဝန်ထမ်းတွေတိုးတက်အောင်ဆောင်ရွက်ပေးရပါမယ်။ လုပ်ငန်းတွေမှာ Management နဲ့ Leadership နှစ်မျိုးစလုံးပြည့်စုံတဲ့ ဦးဆောင်မှုမျိုးလိုအပ်ပါတယ်။ ရိုးသားမှုနဲ့ သမာဓိရှိတဲ့ ၊ ပိုင်ပိုင်နိုင်နိုင်ဆုံးဖြတ်မှုနဲ့ လုပ်ရဲကိုင်ရဲရှိတဲ့ ၊ပူးပေါင်းမှုနဲ့ ညှိုနှိုင်းဆောင်ရွက်နိုင်စွမ်းရှိတဲ့ ၊ လိုက်လျှောညီထွေဖြစ်ပြီး အလိုက်သင့်ပြုပြင်နိုင်စွမ်းရှိတဲ့ အရည်အချင်းတွေအပြင် ဉာဏ်ရည်မြင့်တဲ့ ၊အင်အားရှိတဲ့ ၊ ဇွဲရှိတဲ့ ၊အမြော်အမြင်ရှိတဲ့ ခေါင်းဆောင်ကောင်းတွေ အဖွဲ့အစည်းမှာ စံနမူနာယူစရာအဖြစ် ရှိနေဖို့ လိုအပ်ပါတယ်။

တကယ်တော့ Management နဲ့ Leadership ရဲ့ ကွာခြားမှုကို သတ်မှတ်လို့မရနိုင်ပါဘူး။ Management ပဲရှိပြီး Leadership မရှိရင်မပြည့်စုံသလို Leadership ပဲရှိပြီး Management မရှိရင်လည်း မပြည့်စုံပါဘူး။ အားကောင်းတဲ့ Management သာရှိပြီး Leadership ကောင်းကောင်းမရှိတဲ့ အဖွဲ့အစည်းမှာ အမိန့်ညွန်ကြားချက်တွေများပြီး အမိန့်ညွန်ကြားချက်အတိုင်း အလုပ်ပြီးရုံသာလုပ်တဲ့  သဘောမျိုးရှိလာနိုင်ပါတယ်။ ဒီလိုအဖွဲ့အစည်းမျိုးကို Bureaucratic အဖွဲ့အစည်းမျိုး အဖြစ် သတ်မှတ်လေ့ရှိပါတယ်။

အားကောင်းတဲ့ Leadership သာရှိပြီး Management ကောင်းကောင်းမရှိတဲ့ အဖွဲ့အစည်းတွေမှာတော့ Leadership ကိုကိုးကွယ်မှုရှိလာနိုင်ပါတယ်။ ဒါကြောင့်လုပ်ငန်းအဖွဲ့အစည်းတွေမှာ စနစ်တကျစီမံခန့်ခွဲနိုင်စွမ်း (Management) နဲ့ ဦးဆောင်နိုင်စွမ်း (Leadership) နှစ်မျိုးစလုံးရှိဖို့ လိုအပ်ပါတယ်။

 

မူရင်း။ ။ဒေါက်တာဒေါ်ခင်စန်းရီရေးသားပါသည်

MBA Knowledge Network